અમેરિકા અને ઈરાન વચ્ચેના સીઝફાયર મુદ્દે પાકિસ્તાનનું જૂઠ્ઠાણું દુનિયા સમક્ષ ખુલ્લું પડી ગયું છે. વડાપ્રધાન શાહબાઝ શરીફે એવો પ્રચાર કર્યો હતો કે લેબનાનમાં પણ યુદ્ધવિરામ લાગુ થશે, જેને અમેરિકાએ સદંતર નકારી દીધું છે. આ વિવાદને કારણે ઈરાન અને અમેરિકા વચ્ચેનો ૧૫ દિવસનો કરાર જોખમમાં મુકાયો છે. લેબનાન પર ઈઝરાયેલના હુમલા ચાલુ રહેતા ઈરાને ફરીથી હોર્મુઝ સ્ટ્રેટ બંધ કરવાની ધમકી આપી છે. ઈરાની નેતાઓએ અમેરિકા પર શરતોના ઉલ્લંઘનનો આરોપ લગાવ્યો છે, જેનાથી મધ્ય પૂર્વમાં શાંતિની આશા ઠગારી સાબિત થઈ રહી છે.

પાકિસ્તાની નેતૃત્વએ જે રીતે સીઝફાયરના સમાચાર રજૂ કર્યા હતા, તેણે ઈરાનને ગેરમાર્ગે દોર્યું હોવાનું અત્યારે જણાઈ રહ્યું છે. શાહબાઝ શરીફે પોતાના નિવેદનમાં જણાવ્યું હતું કે ઈરાન અને અમેરિકાની સાથે લેબનાનમાં પણ ૧૪ દિવસ માટે હુમલા રોકવા પર સહમતિ બની છે. જોકે, વ્હાઇટ હાઉસે તત્કાળ પ્રતિક્રિયા આપતા કહ્યું કે અમેરિકાએ લેબનાન અંગે કોઈ પણ પ્રકારની ખાતરી આપી નથી. અમેરિકાના આ ખુલાસા બાદ પાકિસ્તાનની મધ્યસ્થતાને શંકાની નજરે જોવામાં આવી રહી છે. ઈરાન હવે એવું માની રહ્યું છે કે પાકિસ્તાને તેને વાટાઘાટોની ટેબલ પર લાવવા માટે ખોટી માહિતી આપી હતી.

સીઝફાયરના એલાન છતાં લેબનાનમાં પરિસ્થિતિ વણસી રહી છે. ઈઝરાયેલી સેનાએ હિઝબુલ્લાહના ઠેકાણાઓ પર પહેલા કરતા પણ વધુ ભીષણ હવાઈ હુમલા શરૂ કર્યા છે, જેનાથી શાંતિ સમજૂતીનો પાયો હલી ગયો છે. ઈરાનના વિદેશ મંત્રી સૈયદ અબ્બાસ અરાઘચીએ શાહબાઝ શરીફની સોશિયલ મીડિયા પોસ્ટનો સ્ક્રીનશૉટ શેર કરીને અમેરિકા પર નિશાન સાધ્યું છે. અરાઘચીએ સવાલ કર્યો છે કે અમેરિકાએ નક્કી કરવું પડશે કે તે વાસ્તવમાં શાંતિ ઈચ્છે છે કે પછી ઈઝરાયેલના માધ્યમથી પ્રોક્સી વોર ચાલુ રાખવા માંગે છે. ઈરાને સ્પષ્ટ કર્યું છે કે જો લેબનાનમાં લોહી વહેવાનું ચાલુ રહેશે તો તે હોર્મુઝ સ્ટ્રેટને ફરીથી સીલ કરી દેશે.